Dathlu Dydd Gŵyl Dewi yn Sir Ddinbych | Menter Iaith Sir Ddinbych

Gorymdaith Dydd Gŵyl Dewi

Ddydd Llun 2 Mawrth, bu bwrlwm ar hyd strydoedd Dinbych eto eleni wrth i dros 700 o blant ymuno yn nathliadau Dydd Gŵyl Dewi, diolch i waith Menter Iaith Sir Ddinbych, Cyngor Tref Dinbych a’u partneriaid.

Yn arwain yr orymdaith a sicrhau diogelwch pawb oedd swyddogion Heddlu Gogledd Cymru. Roedd dau gwnstabl ifanc ‘Heddlu Bach’ o Ysgol Pendref yn cefnogi’r swyddogion eleni. Cafodd y tri disgybl y cyfle i gael cipolwg y tu ôl i’r llenni ar waith yr heddlu yn Ninbych.

Roedd hi’n braf gweld trigolion a busnesau’r dref allan ar y strydoedd yn cefnogi a mwynhau’r dathliadau wrth i blant, staff, stiwardiaid a gwirfoddolwyr gerdded i gyfeiliant gerddoriaeth Cymraeg.

Er gwaetha’r glaw, roedd Sgwâr y Goron o dan ei sang a chafodd y 15 ysgol a fynychodd y digwyddiad groeso cynnes gan y cyflwynydd radio, Owain Llŷr.

Yn ôl Ruth Williams, Prif Swyddog Menter Iaith Sir Ddinbych, “Rydym yn falch iawn o ddathlu Dydd Gwyl Dewi unwaith eto drwy strydoedd Dinbych eleni ac mae’n braf gweld yr holl blant yn mwynhau.”

“Mae’n nodi Dydd Gŵyl Dewi yn un o uchafbwyntiau ein blwyddyn galendr, ac rydym yn falch o roi’r cyfle i bobl ifanc uniaethu â’u treftadaeth, iaith a diwylliant.

Ychwanegodd Ruth ei bod hi’n “wych croesawu disgyblion a staff ysgolion Tremeirchion, Bro Cinmeirch, Cefn Meiriadog, Pendref, Ysgol y Parc, Pant Pastynog, Henllan, Frongoch, Twm o’r Nant, Plas Brondyffryn, Trefnant, Ysgol Glan Clwyd, Santes Ffraid, Coleg Myddelton ac Ysgol Uwchradd Dinbych atom eleni.

“Rydym yn ddiolchgar i holl ddisgyblion a staff yr ysgolion am drefnu a mynychu. Yn ogystal â chyd-weithio gyda Chyngor Tref Dinbych, cafwyd cefnogaeth staff Grŵp Cynefin, yr Urdd, Rhieni Dros Addysg Gymraeg a sawl gwirfoddolwr. A heb cefnogaeth ein heddlu lleol, ni fyddai’r digwyddiad wedi bod yn bosib. Rhaid diolch i Lidl a’r Co-op am eu cefnogaeth hwythau hefyd.”

Ar ddiwedd y digwyddiad cyflwynwyd blodau ar ran y dorf i gynrychiolydd y Cyngor Tref, y Cynghorydd Ruth Griffiths gan Alys, Lottie a Layla, tair fach a oedd wedi cymryd rhan yn yr orymdaith am y tro cyntaf gyda chriw o ofalwyr plant.

Am luniau o’r digwyddiad a gwybodaeth bellach am wasanaethau Menter Iaith Sir Ddinbych ewch i’r dudalen Facebook, Twitter neu Instagram neu galwch draw i’r wefan. Os oes gennych ddiddordeb mewn gwirfoddoli o fewn eich cymuned neu gefnogi gwaith y Fenter yn ariannol, cysylltwch â Ruth Williams ar 01745 812822 neu ruth@misirddinbych.cymru

Cystadleuaeth Ffenestri Dydd Gŵyl Dewi

Dros yr wythnosau diwethaf, bu busnesau a siopau trefi ledled y sir yn cystadlu’n frwd yn ein cystadleuaeth Ffenestri Dydd Gwyl Dewi. Roedd hi’n braf iawn gweld ffenestri’r sir wedi’u haddurno i ddathlu diwrnod cenedlaethol ein nawddsant.

Diolch yn fawr i’r Cynghorau Tref am gefnogi’r gystadleuaeth ac o feirniadu a thasg anodd iawn oedd dewis enillwyr.

Dyma’r enillwyr o’r trefi eleni. Llongyfarchiadau i bawb!

Llanelwy

1af Jacobs Ladder

2il St Asaph Tyre and Battery

3ydd Caffi Cyfieithwyr / Translator Tearoom