Bu’n haf prysur iawn gyda’n teithiau cerdded a thywys Cymraeg yn Sir Ddinbych.
Cafodd dysgwyr a siaradwyr rhugl y cyfle i fwynhau’r awyr agored, darganfod hanes a natur ein hardaloedd lleol, a chymdeithasu mewn awyrgylch cyfeillgar. Roedd y teithiau’n ffordd wych o ymarfer y Gymraeg yn naturiol a chwrdd â phobl newydd.
Ganol fis Gorffennaf, aeth criw o ddysgwyr ar daith o dan arweiniad Anne Ellis ar hyd Llwybr Hanes Llangollen ar ddiwrnod braf o haf. Dyma daith gyda golygfeydd arbennig o’r ardal. Cafwyd cyfle i grwydro o amgylch Abaty Glyn y Groes a rhyfeddu ar fawredd yr adeilad a oedd o ddiddordeb mawr i bawb. Yna, parhawyd ar hyd y daith gan gerdded ar hyd y gamlas nôl tuag at y dref.