Y Gymraeg mewn treftadaeth, celfyddydau a mwyniant yw’r tri gair i ddisgrifio mewnbwn Menter Iaith Sir Ddinbych i benwythnos Drysau Agored Dinbych eleni.
Denwyd dros 100 o bobl a phlant i weithdai Lego yn Nolbelydr, Trefnant a pherfformiadau un dyn, Thomas Pennant, yng ngerddi Evan Pierce, ger Stryd y Dyffryn, Dinbych.
Diolch i gydweithio hapus gyda’r Landmark Trust, cwmni Mewn Cymeriad a Chyngor Tref Dinbych, mae’r Fenter yn falch o’r cyfle i gynnig digwyddiadau Cymraeg wedi eu selio ar dreftadaeth hanesyddol yr ardal.
“Roedd cael nodi 300 mlwyddiant geni Thomas Pennant, un o ffigurau mwyaf nodedig Cymru’r 18fed ganrif, yn ffordd hyfryd o ddenu pobl i Ddinbych.” meddai Ruth Williams, Prif Swyddog Menter Iaith Sir Ddinbych.
“Fel partner, mae’n braf gallu hyrwyddo a chydweithio gyda grŵp gwirfoddol Drysau Agored i gefnogi a chryfhau’r ddarpariaeth Gymraeg sydd ar gael i drigolion yr ardal ac ymwelwyr i Ddrysau Agored y dref.
Roedd Dolbelydr, y tŷ hanesyddol o’r 16eg ganrif yn Nhrefnant lle ysgrifennodd Henry Salesbury y llyfr gramadeg Cymraeg cyntaf, yn fwrlwm o hwyl a sbri yn ystod y penwythnos. Roedd cyfle i’r plant weld yr adeilad, dysgu mwy am bwysigrwydd Dolbelydr fel man geni’r Gymraeg fodern ac ail greu’r tŷ ar ffurf Lego.
“Roedd hi’n brofiad cyntaf i mi ymweld â Dolbelydr,” eglurodd Erin Aled, Swyddog Datblygu Cymunedol Menter Iaith Sir Ddinbych.
“I mi fel oedolyn, roedd hi’n fraint cael bod mewn lleoliad mor bwysig i Gymreictod ein gwlad. Roedd cael rhannu’r bwrlwm a’r brwdfrydedd hynny gyda’r plant yn y gweithdy Lego yn Sir Ddinbych yn ffordd effeithiol iawn o drosglwyddo gwybodaeth hanesyddol bwysig i’r genhedlaeth nesaf mewn ffurf hwyliog.”